Kutangi nalangilayi na walongo wangu kulwala matukuma patavili wadebe...
Matukuma:- Utamu uwu wikokoseka ya kuvya ukumnyingila mundu ndava ya vikoko vangi vijova ndava ya kunywa manji gachafu muni utamu uwu vilwalalwala vana hasa lusenje lwa chifuku. Uvi ngita kulwala chifuva naha. Mundu mwe ilwala matukuma ihimba mumusina wa singu, mundu ivya na chihoma chikali neju, na mloma woha wichuchuta au wivava chaa na lukumbi lungi mundu nakuhutotala hata kulya madonga.
Hinu kuponesa kwaki, vamavu viteleka nyama ya ng'uku yangali na mwinyu, viteleka mgoda na kupela mtamwa alyelelayi ugali. Kabla ya kuwanja kulya ugali wula, visunya ndongi zivili zidebe zidebe na kukufumbtisa ndongi yimonga upande mmonga wa mlomo, na ndongi yingi upande wungi wa mlomo. Vijova manenu gevagamanyili vene, na kukujovela uhunyayi ndongi zila muchiheneku cha ugali chila. Wakamalyi kulya chidogo ugali wula, wakukamulisa kalundenga ka ngundi mangi upande umonga wa singu na kadenga kangi wikamulisa upande wa pili wa singu. Vandu vangi vakukamulisa hela ngita shilingi naha. Wakawuka pala wihamba mpaka pa ndila malekanu kuni mnyaluhala mmonga akuhindikila chinunu. Wakahika pandila malekanu pala wipolosa au witaka pahi tundengu tula au shilingi zila, na wa mwene wing'namuka na kujumba majuvani kukiliwuka kunyumba changali kulola kumbele kweuhumili kuni wijova: "Matukuma hamba kwa mundu yungi". Wijumba naha mpaka kuyingila munyumba yaku na kudindamlyangu ndyoo. Hinu ngita mundu yungi ipita na kunonga shiling zila gihotola kumhambila mwene matukuma gala.
MWANGALEYE WALONGO....
NAPENDA KUWATAKIENI KHERI SANA YA MWAKA MPYA 2024
3 months ago
