Thursday, January 24, 2013

LELU TILOLEKESAYI-VANGONI VA MPUTA MASEKO!!!

Mputa Maseko na mwene ayingili kuSongea kwa njila yaki. Vandu vangi vijova kuvya Mputa Maseko nde avi mzeyi wa kutumbula kuyingila kuSongea. Kunyanja Mputa amanyikini kwa lihina la Mchecherere. KuTanzania vandu wakumkemerla Mputa. Lihina la Mputa vampangili ndava ya kukomana bwina ngondo. Dadi wa Mputa vamkemelayi Ngomani (Mgabi), vandu va Mputa wamkemelayi Ngomani kwa lihina vakosakosa. Mlongo wa Kosakosa nde Chikuse. Vangoni va Mputa vawukili kuzululand pamonga na Msilikazi kulongosana na Nkosi Chikuse. Vangoni ava voha, vavili va kwalukolo lwa   Matebele pamonga na zwangendaba. Hinu ndava Chikuse na Zwangendaba vakomini ngondo vakalekana ndila.  Kuhuma kumwandi vandu va Mputa Maseko vavi va Zwangendaba. Vandu avo vatama pamonga kwa vasenga. Hinu vangoni va Mputa Maseko pamonga na nduna wavi Ngomani (Mgabi) dadi wa Mputa, vakamleka Zwangendaba na kuhamba kutama kuchidunda cha Domwe kuMagharibi ya mfuleni wa Shire. Vandu vangi va kwaMputa Maseko vasigili kukukwo. Vangoni va kwaMputa Maseko vayingili kuSongea kwa kuvambala Kusini ya Nyanja kukupuka  mfuleni wa Shire. Vakapitingana kumlima wa vayao va kuMsumbiji, kwa vamakua na kwa vaNindi, vakakupuka mfuleni wa kuRuhuma na kuhamba kutama kuMngongoma kaskazini ya mfuleni wa Hanga wewiyingila mumfuleni wa Rutukira wewihamba kuyingila muRuhuhu. Hinu paMngongoma apo nde Mputa akajenga muzi wa nkosi yaki. Pakufwa Mputa Maseko, m´bena waki mwevamkemelayi lihina la Malunda akakamula unkosi. Hinu vangoni va Mbonane vakatumbula ngondo ya kuvatova vandu wa Mputa. Pakuwona naha vandu wa Mputa Maseko vakatila pamonga na nkosi wvi Malunda kuhuma kuMangongoma, wakayingila kuyetu ya vidunda va kuMatogoro. Kuhuma kuMatogoro kula, vandu vangi vakatili na kujumbalila kuMpitimbi mpaka kuhika kuLihiga. Vandu vangi vakavambala kulanda mfuleni wa Ruhuma na kuyingila kuMagugura. Makundi goha gavili gegajumbili na kukupuka Ruhuma gakahamba kukonganeka kuMsumbiji. Lukumbi ulo vandu va Zulu Mbonane vavi vakona vakuvajumbisa tu. Pakuwona naha vandu vaMputa wakawuka majuvani kukupuka mfuleni wa Shire na kuyingila kavili kuNyasaland kwevahumili mwandi. Vandu va Mbonane pevaweni ngita vaMputa vatilili nganila, vakavaleka na kukiliwuka kutama kuSonga mpaka mwa lelu umu.

SONGEA YETU NDIYO ASILI YA WANGONI

SONGEA YETU NDIYO ASILI YA WANGONI